الثلاثاء، 13 يوليو، 2010

ابو حسين من اجل الحرية: اوعى تصحى الفرعون

ابو حسين من اجل الحرية: اوعى تصحى الفرعون: "كانت الرسوم البريدية للخطاب المسجل في ذلك الحين 15 قرشاكانت المظاريف التي تحتوى على أوراق هامة لابد إرسالها بريديا بخطابات مسجلةوأنا بقى متق..."

اوعى تصحى الفرعون

كانت الرسوم البريدية للخطاب المسجل في ذلك الحين 15 قرشا
كانت المظاريف التي تحتوى على أوراق هامة لابد إرسالها بريديا بخطابات مسجلة
وأنا بقى متقوليش ...طول عمري حمار ...طول عمري أؤمن بالحرية ...وافتح بقى بالكلام من غير سلام ...أمال إيه ..أنا حر ...أنا عبد لله...أنا مش عبد عند بشر... واتارينى حمار... الفرعون نايم في كل نفس مصرية خليه نايم أوعى تصحيه ...أنا يا محترم بقى صحيته ...هتبحلق لي ليه ...ايوه أنا صحيت الفرعون ...أنت برضه ساعات تصحيه ...عندما تشعر بضرب البراطيش البلاستيك على قفاك وأنت بتقول أىىىىىىىى...أنا عملت إيه يا ناس ....أنا لم ارتكب جرما ...تبقى حمار زيي وصحيت الفرعون
شوف ياد انت وهى :-
استلمت من البريد الوارد شيك مسحوب من مصلحة حكومية بمدينة ههيا بمبلغ إيه ...يا محترم ب خمسة صاغ أو خمسة قروشن
لحساب مين يا محترم انت وهى لحساب مصلحة حكومية تانية بس فى الزقازيق( لأ يا اخى شوف الذمة والدقة ...امال ايه )
المشكلة ان الشيك ينقص توقيع
يبقى صحصح ياد انت وهى لحسن اديك على بوزك
15 قرش لارسال الشيك من ههيا الى الزقازيق
15 قرش من المصلحة الحكومية بالزقازيق الى البنك لايداعه بحساب الجهة
15 قرش علشان نرد الشيك للمصلحة بتاعة الزقازيق نقولها الشيك ينقصه توقيعات واستوفيه يا بيضة يا أم شعر اصفر
15 قرش من المصلحة الحكومية بالزقازيق للمصلحة بتاعة ههيا تقول لها فيه استوفى الشيك يا جميلة انتى
تقوم بقى المصلحة بتاعة ههيا تستوفى الشيك ( اهو كده الشغل المظبوط )
15قرش من جماعة ههيا بعد ما يصلحوا الشيك ويبعتوه لجماعة الزقازيق ( شوف الامانه)
15 قرش من بتوع الزقازيق ويبعتوا الشيك للبنك علشان يتحصل ويودع بالحساب
يبقى الناتج ياد انت وهى 90 قرش بالتمام
حط عليه كام قرش ورق وشغل ووقت من عندى انا متحطش خليهم على زى ما انا عملت مع المرحوم مراقب الحسابات فى ذلك الحين
انا عند اكتشافى ان الشيك معيب قلت اختصر وادفع انا قيمة الشيك للجماعة بتوع الزقازيق ومجتش من شلن ( ايوه انا طول عمرى فنجرى )
اعددت المستند بالخصم على حسابى وختمته بختم المشط وختم عمل روجع ومش فاكر قلت له اتفضل ولا لأ
المراقب :- ايه اللى انت عامله ده يا سى زفت .
انــــا ( واعوذ بالله من قولة انا ) :- ايوه يا سعادة الريس فيه ايه
المراقب :- الشغل الزفت اللى انت عامله .
انــــا ( واعوذ بالله من قولة انا ):- مبسوط انت من الاداء الراقى بتاعى
المراقب :- سيادتك بتخترع فى الشغل
انــــا ( واعوذ بالله من قولة انا ):- كل اللى احنا قاعدين فيه اختراعات ايه المانع ان انى ما اخترعش
المراقب :- اتكلم كويس ورد على كويس واشتغل زى التعليمات ما بتقول
انــــا ( واعوذ بالله من قولة انا ):- يعنى اكلف البنك 15 قرش ومطبوعات كمان بريال علشان يبقى ده الصح اعتقد بتوع الزقازيق يهمهم فى المقام الاول انهم ياخدوا الشلن بتاع الشيك واهم خدوه بتوع ههيا لما الشيك ما يتخصمش عليهم بعد سنوات هياخدوه ايرادات لهم
المراقب :- الله يلعن ابو عبد الناصر اللى خلا عينتك بتعرف بتتكلم انا ابن عمى ايام الملكية مد العمدة على رجليه
انــــا ( واعوذ بالله من قولة انا ):- الله يلعن ابو عبد الناصر علشان مضربش امثالك على البتاعة الكبيرة اللى وراهم
وهنا ياد انت وهى صحى الفرعون
مذكرة للمدير.... والمدير نادى على الين ...والين تكتب ومخبية الالة الكاتبة بالجورنال لحسن حد يعرف ايه اللى بتكتبه....ومختار قال هاتوه
مختار :- ايه اللى انت عملته ده
انــــا ( واعوذ بالله من قولة انا ):- انا بوفر للبنك ومبحبش الغى عقلى واعتقادى ان ده الصح وخلاف ذلك هو الخطأ
مختار :- انت هتتحاسب مؤكد على الكلام اللى انت قلته بس برضه لازم تعمل المستند زى ما الاستاذ فتحى قال لك والا انت بقى عارف فيه تقارير ...فيه حوافز...
انــــا ( واعوذ بالله من قولة انا ):- بس فى سرى علشان انا باكون جبان اوقات كتيرة واد انت وهى بتقول ان انا جبان على طول ماشى ... فيه قرف باؤكد فى سرى علشان ما يطلعش لى واحد فلحس يقول كذاب وكلمة تانية ياد انت وهى هفشر بقى
نصيحة جرب تخرب ... اوعى تصلح تفلح ...علشان محدش يقول عليك حمار
مع تحيات الحمار ومع اعتذارى للحمار ...
ابو حسين من اجل الحرية

الثلاثاء، 29 يونيو، 2010

انا واعوذ بالله من القارئ

فكرة كتابة مذكرات تنتابني من حين لآخر ولكن سريعا ما تخرج إلى حيز اللا تطبيق لأسباب عديدة :ـ
أنني لست سياسيا كاذبا
أو عالما مشهورا
أو فنانا يشار إليه بالبنان أو غير البنان
أو رحالة جال وطاف وشاهد
أو بطلا قوميا خاض بطولات
أنني اعترض كثيرا على نوعيات كبيرة من شرائح الشعب المصري
الأخيرة أنني اعترض على قارئي ومش عاجبك بتقرا ليه متقفل يابا الكمبيوتر ومتكملش قراءة شوف لك مدونة تانية اتفرج على فيلم... مسلسل صلى ركعتين اتخانق مع مراتك بس انا فى الاول وفى الاخر عارفك ...ستقرأ غصبا عن بوزك ياد انت وهى
سيقول القارئ :ــ
الرجل ده كــــــــــــــذاب
إيه عرفنا إن الكلام ده حصل
خليه يا عم يكتب هو حد حايشه
أنا كنت شاهد على الموضوع ده و محصلش
اشمعنى جاى يقول الكلام ده الوقت ده ومقالش من زمان ليه
ومش هاخلص من القارئ ولا السامع ولا البوليس ولا النيابة وهات يا نكت ولكنني أيها القارئ قررت أن اكتب . وأنت إذا أردت أن تقرا ألا فاقرأ . قررت عدم القراءة... بين الكاتب اللي هو أنا... وأعوذ بالله من قولة أنا... والقارئ اللي هو انت ...وأعوذ بالله منك انت... ومن أفكارك السوء ..( يفتح الله )محدش زانقك على القراءة . ستكمل القراءة وأنت تشتم . اشتم بس لو سمعتك مش سايبك . وإذا سبتك فسداد ديون . فانا يا محترم طول النهار ولساني زى المبرد طالع شاتم نازل شاتم . مرة اولمرت . شامير . بوش . اللى بالى بالك ..من العينة دى مبخليش . وبعدين اخش على الفنانين ولاعبي كرة القدم بالذات ولاعبي مصر فقط أظن بعد ما اشتم كل هؤلاء مش عايز أتشتم لا هاتشتم اشتم يابا الحاج .....خد راحتك واشتم
هتحلف إن ده محصلش . مزعل نفسك ليه يابا أنا فشار
مش عاجبك كتابتي متقراش ...بص بقى أنا اكتب على كيفي و انت تقرا على كيفك ...متقراش بس المهم( شيل القاف و حط الخاء)اعمل اللي تقدر عليه أنا وراك بالكتابة والزمن طويل
وشوف كمان أنا لن اسرد الأحداث بترتيبها الزمني أنا اللي هيطق في دماغي الأول سأكتبه وأنت تقرا من الأول من الآخر ميهمنيش متقراش خالص انت حر أظن أستاذنا القارئ لا يوجد ديمقراطية أو مهلبية أكثر من هذا كل واقرأ مش عاجبك اقرأ باستبدال القاف خاء لان ده اللي انت شاطر فيه
بعض الأسماء سأقوم بذكرها
والبند المشرف منهم :ـ العظماء وهؤلاء تاريخ واجب الشكر والامتنان لهم عندي واقل الوفاء ذكرهم بأسمائهم كاملة بل ووظائفهم
البند المقرف منهم :ـ وهؤلاء الزبالة والحثالة والنخاسة والنجاسة ومن قدموا اعراضهم للموائد وتباهوا بمعصية الله وإفشاء الغيبة والعيبة والخيبة سأذكرهم بأسمائهم أيضا وياريت واحد يرفع على قضية نفسى اكرر اللى هاكتبه فى المحاكم
البند الأخير منهم :ـ وهم الجبناء ومستبدلي اللات والعزى بالجنيه والمنصب والكرسي وهم من أهملهم التاريخ وكرههم المؤرخون والذي سأقول اسمه مستعارا يحمد الله وميجيبوش لنفسه وميقولش دا بيقصدنى انا لانى هاقول اه باقصده حتى لو مش هو المقصود واللى على راسه بطحة بيحسس عليها
أخيرا : ــ هاكتب بالعربية الفصحى أم بالعامية المصرية طبعا يا عمنا أنا مش أديب ولا محترف كتابة وأن كنت بقادر على الاثنتين
وبناء على ما تقدم أنا على كيفي اكتب كما يحلو لى مش بمزاجك يا قارئ ( والله انا مش عارف قارئ دى شتمه ياد انت وهى ولا ايه )
ملحوظــــــة :ـ لم أكن يوما كذابا ولن أكون واعرف تماما انك عزيزي تشعر بالعظمة وأنت تقرا تلك الحقائق فكاتبها يكتبها من أعماقك قبل أعماقه
وبداية القلاطة زى الكتاب الكبار اللي أنا منهم قررت أن أضع عنوانا لهذا العمل وقد أسميته :ـــ
صناعة العبيــــــد
وألف رحمة تنزل عليك يا عمنا ارنست همنجواى صاحب رواية لمن تدق الأجراس وكمـــا كتبت في مقدمتها لمن تدق الأجراس إنها تدق لك
سأكتب كما العظماء
لا تسالنى اين تصنع العبيد
انها صنع مصر